AVILÉS REVOLUCIONARIU
L' Ayuntamientu d' Avilés cellebra l'antroxu güeyando pa Francia y nun momentu críticu na hestoria d'esti país vecín. A mí eso de festexar l'antroxu camentando na Revolución Francesa tocóme la fibra sensible porque esi movimientu llibertariu, reconozo que pelín violentu, foi 'l que fizu que les idegues de la Illustración semaren, na conciencia colleutiva, el futuru espoxigue de les clases obreres nel restu d'Europa, principalmente, afitándose en tres pallabres máxiques: Liberté, égalité, fraternité.
Camiento que nun tuvo que ser ná cenciello enfrentase a un poder absulutu y llograr que tou un pueblu ,afamiáu y amiseriáu, s'aconcellara pa quitar d'enmediu a toa una panda fartones ya mangantes qu' abellugaos y afitaos en títulos nobiliarios, aristocráticos y relixiosos facíen y desfacíen, al so antoxu, lo que-yos vinía en gana disfrutando de la vida ensin preocupase de que la opresión y el revanchismu taben faciendo mella nel pueblu.
"A tou gochín y llega'l so Samartín" y a elles y ellos llegó-yos, comu tristemente yera d'esperar (porque la violencia nun tá xustificada en dengún casu), la guillotina que... ¡pal casu... !
Lo malo de estes coses ye que nestes situaciones crítiques terminen pagando "xustos por pecadores" y nel procesu llimpieza que llevó a cabu 'l pueblu francés, comu consecuencia de la necesidá, la ruindá na que taben los franceses, les vengances personales, les denuncies y, porqué non, de les envidies, tolo que golía a clase alta yera carne de guillotina escaeciendo que una cosa yeren les persones y otra, en forma distinta, les instituciones lo que dio llugar a la paradoxa de que, curiosamente, un pueblu que clamaba xusticia prauticaba xuicios, en delles ocasiones, inxustos. Los yankees diríen, con sorna, qu' eso yeren daños collaterales.
Col pasu'l tiempu, cola globalización ya interné (¡qué prestoso ye interné!), los pueblos sofistíquense y los oprimíos, comu en Túnez y Egipto, pa suerte de los sos opresores, ya nun sacien, ante l' "Allons enfants de la patrie. Le jour de gloire est arrivé!", ,les ganes de revancha con violencia y derramamientos de sangre . Güei la mocedá tá organizada, estudiada y saben que matar nun da la llibertá nin quita la fame. Por eso faen revoluciones pacífiques, intelixentes ensin necesidá de afeitar les tiestes de los opresores porque yos dan onde más yos duel: na faltriquera, parando la producción, los negocios, concentrándose y faciendo-yos ver que ya nun tan nesti mundu pa engondar vaques palaciegues comu la que tien que soportar el pueblu de Libia.
Asina pues, a mazcaritase y a festexar que somos llibres, a aceutar que la nuesa esistencia ye efímera y a cellebrar, se ponga comu se ponga la rancia y seca Dña. Cuaresma, qu' entovía tenemos ganes de folixa.
¡Feliz Antroxu a toes y toos!
No hay comentarios:
Publicar un comentario